Rudrashtakam Divine Invocation

▶ Play this song to follow along.

नमामीशमीशान निर्वाण-रूपं

विभुं व्यापकं ब्रह्म-वेद-स्वरूपम् ।

निजं निर्गुणं निर्विकल्पं निरीहं

चिदाकाशमाकाश-वासं भजेऽहम् ॥ एक ॥

निराकारमोंकार-मूलं तुरीयं

गिरा-ज्ञान-गोतीतमीशं गिरीशम् ।

करालं महाकाल-कालं कृपालं

गुणागारं संसार-पारं नतोऽहम् ॥ दो ॥

तुषाराद्रि-संकाश-गौरं गभीरं

मनोभूत-कोटि-प्रभा-श्री-शरीरम् ।

स्फुरन्-मौलि-कल्लोलिनी-चारु-गङ्गा

लसद्-भाल-बालेन्दु कण्ठे भुजङ्गा ॥ तीन ॥

चलत्-कुण्डलं भ्रू-सु-नेत्रं विशालं

प्रसन्नाननं नीलकण्ठं दयालम् ।

मृगाधीश-चर्माम्बरं मुण्डमालं

प्रियं शङ्करं सर्वनाथं भजामि ॥ चार ॥

प्रचण्डं प्रकृष्टं प्रगल्भं परेशं

अखण्डं अजं भानु-कोटि-प्रकाशम् ।

त्रयः-शूल-निर्मूलनं शूल-पाणिं

भजेऽहं भवानी-पतिं भाव-गम्यम् ॥ पांच ॥

कलातीत-कल्याण-कल्पान्त-कारी

सदा सज्जनानन्द-दाता पुरारी ।

चिदानन्द-सन्दोह मोहापहारी

प्रसीद प्रसीद प्रभो मन्मथारी ॥ छह ॥

न यावदुमानाथ पादारविन्दं

भजन्तीह लोके परे वा नराणाम् ।

न तावत् सुखं शान्ति-सन्ताप-नाशं

प्रसीद प्रभो सर्व-भूताधिवासम् ॥ सात ॥

न जानामि योगं जपं नैव पूजां

नतोऽहं सदा सर्वदा शम्भु तुभ्यम् ।

जरा-जन्म-दुःखौघ-तातप्यमानं

प्रभो पाहि आपन्नमामीश शम्भो ॥ आठ ॥

रुद्राष्टकमिदं प्रोक्तं विप्रेण हरतोषये ।

ये पठन्ति नरा भक्त्या तेषां शम्भुः प्रसीदति ॥

इति श्री गोस्वामी तुलसीदास-कृतं

श्री रुद्राष्टकं सम्पूर्णम् ॥